انسان آغاز تاریخ ہی سے جذبات اضطرار اور ذہنی کرب کا شکار چلا آ رہا ہے۔ اپنی اس تکلیف سے نجات کے لیے بنی نوع انسان نے مختلف ذرائع کو اختیار کیا ہے اور طرح طرح کی کوششیں کی ہیں۔ اس نے اس ضمن میں فطری وسائل کے علاوہ مافوق الفطری وسیلوں کا دامن بھی تھاما ہے۔ دنیا کی رنگارنگ ثقافتوں پر نظر ڈالنے سے اندازہ ہوتا ہے کہ مقامی اعتقادات اور روایتی طریقوں سے قطع نظر ذہنی آسودگی کے فروغ اور دماغی انتشار کے خاتمے میں مذہب کو ہمیشہ ہی سے مرکزی مقام و اہمیت حاصل رہی ہے۔ ذہنی پستی واضمحلال میں جتلا شخص منفی انداز فکر اختیار کر لیتا ہے۔ کبھی اس کے جی میں آتا ہے کہ خود کشی کر کے اس جہان کرب و الم سے منہ موڑ لے، لیکن اس خواہش کی شدت کے باوجود ایک قوت اسے اس اقدام سے باز رکھتی ہے۔ ماہرین نے دوران علاج جب اس قسم کے لوگوں سے سوالات کیے تو انہوں نے اس بات کا کھلے دل سے اعتراف کیا کہ عین اقدام خودکشی کے وقت انہیں اللہ کے رحم و کرم کا وعدہ یاد آیا۔ اور یہی بات انہیں اس اقدام سے باز رکھنے کا باعث بنی۔ یہ عین ممکن ہے کہ ایسے نازک وقت میں کسی مسلمان کو اللہ تعالٰی کا یہ فرمان لفظ بہ لفظ یاد نہ ہو کہ "اے مسلمانو! خود کو ہلاک نہ کرو کیوں کہ اللہ تم پر مہربان ہے۔ تاہم اپنی تعلیمات سے آگاہ ہر مسلمان یہ ضرور جانتا ہے کہ اس کے خالق نے خودکشی سے منع فرمایا ہے۔ یہ قدم اس کے مذہب اور عقائد کی نظر میں مذموم ہے لہذا اسے اس سے اجتناب کرنا چاہیے۔ اسی طرح اسلام نے شراب کو حرام قرار دے کر ایک بڑا اہم مثبت اقدام کیا ہے۔ شراب نوشی جیسے پیچیدہ مسئلے کا واحد حل یہی ہے کہ اسے حرام سمجھ کر ہاتھ نہ لگایا جائے۔ جہاں تک امراض و علاج کا تعلق ہے ہم بدستور مغرب کی اندھی تقلید کر رہے ہیں ۔ کروڑوں روپے کے خرچ سے فارغ التحصیل ہونے والے ہزاروں ڈاکٹر اندرون و بیرون ملک روزگار کے متلاشی ہیں۔ ان کے لیے دیہی علاقوں میں کام کرنے کے مواقع نکالنے کے منصوبے بنائے جارہے ہیں، لیکن طب جدید کے یہ عالمین جو بخار کا پتا چلانے کے لیے تھرما میٹر کے محتاج ہیں جدید گراں معالجاتی آلات، مشینوں اور مہنگی دواؤں کے بغیر کام کرنے سے قاصر ہیں؟