ترا جلوہ آئے نظر میرے مولیٰ

ترا جلوہ آئے نظر میرے مولیٰ
نظر کو اٹھاؤں جدھر میرے مولیٰ

کرم ہوگیا مجھ پہ گر میرے مولیٰ
تو باندھیں گے رخت سفر میرے مولیٰ

تڑپ میرے دل کی بڑھی جا رہی ہے
” دکھا دے مجھے اپنا گھر میرے مولیٰ "

میں حمد و ثناء لکھوں ہر وقت تیری
عطا کر مجھے وہ ہنر میرے مولیٰ

گناہوں کی دل دل میں جب بھی پھسوں میں
تو دل میں رہے تیرا ڈر میرے مولیٰ

عطا کر مجھے اتنی طاقت کہ میں بھی
کروں ذکر آٹھو پہر میرے مولیٰ

ہر اک شے پہ قادر ہے ، مالک ہے تو ہی
کہیں کیوں نہ جن و بشر میرے مولیٰ

پڑھوں کلمۂ طیبہ میں ہمیشہ
حضر میں رہوں یا سفر، میرے مولیٰ

ہے انعام و اکرام جس رہ پہ تیرا
چلانا اسی راہ پر میرے مولیٰ

ہو عنبر سے عاصی پہ تیرا کرم تو
وہ پھر کیوں نہ ہو معتبر میرے مولیٰ