نبی کی سیرتِ اقدس کو جو دل میں بساتے ہیں

نبی کی سیرتِ اقدس کو جو دل میں بساتے ہیں
وہ اپنے واسطے خلد بریں میں گھر بناتے ہیں

نہیں جاتی ہے بینائی کبھی بھی ان کی آنکھوں کی
جو پائے مصطفی کے دھول کا سرما لگاتے ہیں

جمالِ نور کی تابش بیاں کیسے کرے کوئی
اسی اک نور کے صدقے ستارے جگمگاتے ہیں

بہارِ باغِ طیبہ کا ہے منظر خوش نما ایسا
جہاں پر غم کے مارے بھی ہمیشہ مسکراتے ہیں

ہمارا مدعا بھی حاجیو سرکار سے کہنا
کہ ہم دن رات اُن کے ہجر میں آنسو بہاتے ہیں

میسر یک بہ یک ہو جاتی ہے تسکینِ جاں ہم کو
کبھی جو کلمۂ "انظر لنا” لب پر سجاتے ہیں

بھلا کیوں کر نہ مانگیں ہم مرادیں ان کی چوکھٹ سے
وہاں تو تاج ور بھی تاج کو کاسہ بناتے ہیں

دعائیں ان کی ٹکراتی ہیں خود بابِ ا جابت سے
انھیں اپنی دعاؤں میں وسیلہ جو بناتے ہیں

نوازش اس لیے ہے قبر کی وحشت سے بے پروا
سنا ہے مصطفی آ کے وہاں جلوہ دکھاتے ہیں