عشق کا منصور تو ہی مسندِ رسوا بھی تو

عشق کا منصور تو ہی مسندِ رسوا بھی تو
جلوہ گاہِ بد شعاری اور پھر زیبا بھی تو

کیوں کسی کی ہو ضرورت اے مرے ذی محترم
میکدہ بھی رند بھی ساقی بھی تو مینا بھی تو

تجھ سے ہے منسوب خوشبوۓ گلِ رعنائیاں
سوسن و سنبل کنول اور عنبرِ سارا بھی تو

اک طرف ہے جامِ الفت اک طرف ہے معرفت
بزم گاہِ ذوق افزا ، بادۂ صہبا بھی تو

سوزشِ دل، فکرِ اعلیٰ ، شاعرِ جدت طراز
داستانِ عشق تو اقبال بھی مرزا بھی تو

کارگاہِ ظلم ہے اس دہر میں تیرا وجود
شکوۂ امروز بھی تو دشمنِ فردا بھی تو

قائدِ ملت ہے منصب اور درویشی صفت
میرِ محفل شمعِ مجلس بادیہ پیما بھی تو

چشتیِ بیمار ہے تیرا عجب وصفِ کمال
ہے ہجومِ کارواں ہر سو مگر تنہا بھی تو