بدن کے لمس میں چھپتی رہی کتابِ حیات

بدن کے لمس میں چھپتی رہی کتابِ حیات
نہاں تھی آنکھ میں تابندہ ایک خوابِ حیات

کبھی تو ہونٹ پہ آجاۓ روشنی کا مزاج
کبھی تو زخم سے ابھرے ہیں انقلابِ حیات

دلِ تپاں میں فروزاں جنوں کا لاواؔ ہے
بدن پہ سایۂ دوزخ ہے، التہابِ حیات

نگہ میں عکسِ جمالِ چراغِ راہِ مبیں
کھلا ہے دل میں کوئی لالہ و گلابِ حیات

لبوں پہ وردِ تسلسل، دوام کا سرنام
مری حیات کا بس ہے یہی نصابِ حیات

یہ دل ہے آتشِ شوق و جنوں میں ڈوبا ہوا
یہ جسم جیسے ہو سوزِ ازل عذابِ حیات

نقوشِ راہِ محبت پہ جب بھی چلتا ہوں
مہکنے لگتے ہیں صحرا، گلاب، آبِ حیات

خموش چاند نے سونپی تھی رات کو خوشبو
وہی سکوت ہے شاید مرا نصابِ حیات

میں اک سراب کے پیچھے نکل گیا تھا کہیں
پھر اک چراغ نے لکھ دی مری کتابِ حیات

گماں کا زہر پلایا گیا یقیں کی طرح
عجیب طور تھا دنیا کا انتخابِ حیات

کسی کے لمس نے چھو کرکیا یہ راز عیاں
کہ تم ہو عکس کسی گمشدہ شبابِ حیات

مناظرِ شبِ امکاں سے میں گزرتا ہوں
فسونِ وقت میں تحلیل ہے شبابِ حیات

لبوں پہ حرفِ تمنّا جلا چراغوں سا
صدا کی راکھ میں پنہاں رہا جوابِ حیات

بکھر بکھر گئی یادوں کی داستاں ہر سو
نہ عکس میرا سلامت نہ انتسابِ حیات

سکوتِ لب میں چھپی ہے تپش صداؤں کی
یہ خاموشی ہی بنی ہے مرا خطابِ حیات

سرشتِ شب میں کوئی خوں چکا عبارت تھی
چراغِ ذات جلا کر کیا حسابِ حیات

فسردگی کے سمندر میں بھیگی یادیں تھیں
میں اشک پی کے پلاتا رہا شرابِ حیات

گزر چکا ہوں معانی کے سب مقابر سے
مگر لبوں پہ ابھی تک ہے اضطراب حیات

میں اپنے عکس سے آگے نہ جاسکا چشؔتی
پلٹ کے خود پہ کیا میں نے احتسابِ حیات