اے رازدارِ سوزِ نہاں، المدد مدد
اے رازدارِ سوزِ نہاں، المدد مدد
اے ہم نواے اہل فغاں، المدد مدد
یہ خاک زادگانِ الم کب تلک جئیں؟
اے راز دارِ شان و نشاں المدد مدد
ٹوٹے نہ آرزو کا چراغِ سحر کبھی
اے مشعلِ امیدِ جہاں المدد، مدد
ہیں آسماں سے آج بھی نازل بلا کی شب
اے حافظِ وجود و اماں المدد مدد
ہم کو ملا نہ سایۂ دیوارِ زندگی
اے مونسِ دریدہ مکاں المدد مدد
احوالِ زخمِ دل کو سناؤں کہاں تلک؟
اے محرمِ سکوتِ زباں المدد مدد
وحشت کدے میں گونج رہی ہے صدائے غم
اے راحتِ قلوبِ نہاں المدد، مدد
بکھری ہوئی حیات کو پھر جوڑ دے شہا
ہے خستہ جاں کا حالِ بیاں المدد، مدد
سایہ ملا نہ خیمۂ امن و اماں کوئی
ہے آفتابِ غم کی کماں المدد مدد
یادوں کی وادیوں میں بھٹکتاہےحوصلہ
اے رہبرِ جنونِ رواں المدد مدد
باطن کی سرزمیں پہ بھی طاری ہیں معرکے
ہلچل میں مبتلا ہے جہاں، المدد مدد
اے دستگیرِ عالمِ کون و مکاں کرم
چشؔتی پہ اب ہے کوہِ گراں المدد مدد