اے نسیمِ صبحِ گاہی اے فضاۓ سرفرازی

اے نسیمِ صبحِ گاہی اے فضاۓ سرفرازی
کوئی دے پیامِ دلبر کوئی کر کرشمہ سازی

کسی بے گنہ بدن سے نہ گرے لہو کے قطرے
ہو کدورتوں سے خالی مرا جسمِ پاک بازی

ترا حسن حسنِ آخر تری آنکھیں مومِ سوزش
ترا عشق کیف پرور تو عجب ہے اہتزازی

تو طلسم افزا گوہر تو جمالِ رنگِ محفل
تو دواۓ دردِ منداں تو ہی بید و چارہ سازی

تو عروسِ ذوق افزا تو نگاہِ تند و خیرہ
رہے برق زا ہمیشہ تری یہ سخن طرازی

ترا صبح پاس آکر یوں نویدِ وصل دینا
کہیں مار ہی نہ ڈالے یہ اداۓ دل نوازی

سبھی رنگِ گل درخشاں میں الگ ہوں گلستاں سے
کہ نظر نواز ہے بس یہ مقامِ امتیازی

کبھی فنِ عشق و الفت کے دیے ہیں درس ہم بھی
نہ کوئی ہمیں سکھاۓ یہ کمالِ عشق بازی

نہ پری و شاہزادی نہ کوئی ہو حورِ جنت
ہے حقیقتوں کے آگے ترا حسن بس مجازی

یہی آرزو ہے میری بنو میں بھی شمعِ محفل
رہے مشغلہ ہمہ دم مرے یار بیت بازی

یہاں من کے سب ہیں شاہی یہ ہے بزمگاہِ چشتی
کوئی وقت کے ہیں رازی کوئی رومی اور ایازی