اہلِ عرفان و ادب پا بہ قدم آتے ہیں
اہلِ عرفان و ادب پا بہ قدم آتے ہیں
بادۂ عشق لیے اہلِ حرم آتے ہیں
دھڑکنیں ساز ہوئیں، جسم ہوا رقص کناں
شوق کی موج میں طوفان بہم آتے ہیں
حرفِ تحقیق کبھی بانگِ درا بنتا ہے
قافلے راہ میں کعبہ سے ارم آتے ہیں
جس گھڑی شوقِ مۓ و عشق میں شدت آۓ
اس گھڑی شیخ بھی باحالِ کرم آتے ہیں
لفظ آئینۂ دیوارِ تجلی ٹھہرے
جب سخن گردِ خیالاتِ قلم آتے ہیں
موجِ افکار میں رقصاں ہے شرارِ معنی
شعلۂ حرف سے ہی لفظ بہم آتے ہیں
حدتِ سوز کے تابندہ خیالوں کے ہجوم
نوع بہ نوع فکر میں عنوانِ فہم آتے ہیں
تجھ کو معلوم نہیں رقص کا مفہوم ابھی
خاک ہو کر ہی کوئی رندِ حرم آتے ہیں
درسِ آداب لیا کرتے ہیں چشؔتی پہلے
پھر سرِ بزم فنا اہلِ قلم آتے ہیں