آخرِ شب میں بھی تنویر عطا ہوتی ہے
آخرِ شب میں بھی تنویر عطا ہوتی ہے
قالبِ نعت میں تحریر عطا ہوتی ہے
جب تصور میں ہو گنبد کا وہ سبزینہ جمال
آنکھ کو دید کی تصویر عطا ہوتی ہے
نعت کہنے کی لیاقت ہو نفاست آثار
ورنہ الفاظ کو زنجیر عطا ہوتی ہے
جب مدینے سے کوئی آہٹِ خوشبو آۓ
دل کو تب ساعتِ شب گیر عطا ہوتی ہے
شاخِ امید پہ جب نعت کا گل کھل جاۓ
زندگی کو نئی تعبیر عطا ہوتی ہے
جب ہو تذکارِ شہِ والا تحمل کے تلے
قلب کو حالتِ تسخیر عطا ہوتی ہے
اسمِ احمد میں چھپے رازِ ازل کے جلوے
حرفِ مستور کو تاثیر عطا ہوتی ہے
ذکر قرطاسِ ادب پر جو بکھر جاتا ہے
سطر در سطر کو تطہیر عطا ہوتی ہے
نامِ سرکار اقامت ہو اگر قلب نشیں
زندگی کو نئی تقدیر عطا ہوتی ہے
جب ہواۓ شہِ بطحا سے ٹکڑ جاتے ہیں
خود بخود زخم کو تصغیر عطا ہوتی ہے
سجدۂ شوق ہو نعتوں کی زمیں پر چشؔتی
تب ہی جذبے کو بھی تعبیر عطا ہوتی ہے