اے نسیمِ صبحِ طیبہ کوچۂ جاناں میں آ

اے نسیمِ صبحِ طیبہ کوچۂ جاناں میں آ
آ نویدِ وصل لے کر خواب کے ایواں میں آ

اے شبِ دیجور کی خنکی، نسیمِ جاں فزا
پیالۂ عرفاں اٹھا اور محفلِ رنداں میں آ

خارزارِ زندگی میں روشنی باقی نہیں
تابشِ نورِ سحر بن ظلمتِ ویراں میں آ

لے کے اذنِ حاضری دربارِ یثرب سے نسیم
سرعتِ رفتار لے اور دیدۂ ارماں میں آ

ہے زمیں تیری بدولت رشکِ فردوسِ بریں
اے صبا! مشکِ گلِ طیبہ لیے داماں میں آ

بارشِ فیضِ عنایت کے کرم آثار بوند
خشک خطہ، تپتے صحرا، لق و دق میداں میں آ

آس کا جگنو لیے راہِ وفا تکتا ہوں میں
اے نظر کے خوابِ زرّیں، خواہشِ نیناں میں آ

ایک ہی شمعِ نشستِ ناز کا ہے آسرا
اے چراغِ آرزو، اجڑے ہوئے دالاں میں آ

حلقۂ دار و رسن میں گونجتی ہے اک صدا
عفو کی سوغات لے کر آ درِ یزداں میں آ

دھوپ کے صحراؤں میں نخلِ یقیں بےآب ہے
اے گھٹا! بارش لیے امید کے کنعاں میں آ

یہ جو صحراہےیہ وحشت یہ تمازت یہ جلن
اے خیالِ باغِ طیبہ خوابِ ریگستاں میں آ

اوڑھ لے نعتِ نبی کی شال، اے اشعار پھر
چشتیِ بیمارِ دل کی نعت کے دیواں میں آ