صفا و مروه
یہ چھوٹی
چھوٹی دو پہاڑیاں ہیں جو حرم کعبہ مکرمہ کے بالکل قریب ہی ہیں اور آج کل تو بلند
عمارتوں اور اونچی سڑکوں اور دونوں پہاڑیوں کے درمیان چھت بن جانے اور تعمیرات کے
ردو بدل سے دونوں پہاڑیاں برائے نام ہی کچھ بلندی رکھتی ہیں۔ انہی دونوں پہاڑیوں
پر چڑھ کر اور چکر لگا کر حضرت بی بی ہاجرہ رضی اللہ تعالیٰ عنہا نے اس وقت پانی کی
جستجو اور تلاش کی تھی جب کہ حضرت اسمعیل علیہ السلام شیر خوار بچے تھے اور پیاس کی
شدت سے بے قرار ہو گئے تھے اس لئے زمانہ قدیم سے یہ دونوں پہاڑیاں بہت مقدس مانی
جاتی ہیں اور حجاج کرام ان دونوں پہاڑیوں پر چڑھ کر بڑے احترام اور جذبہ عقیدت کے
ساتھ طواف کرتے اور دعائیں مانگا کرتے تھے۔
مگر زمانہ
جاہلیت میں ایک مرد جس کا نام ” اساف“ تھا اور ایک عورت جس کا نام ” نائلہ”
تھا ان دونوں خبیثوں نے خانہ کعبہ کے اندر
زنا کاری کر لی تو ان دونوں پر یہ قہر الہی نازل ہو گیا کہ یہ دونوں مسخ ہو کر
پتھر کی مورت اور بت بن گئے پھر زمانہ جاہلیت کے بت پرستوں نے ان دونوں مجسموں کو
کعبہ سے اٹھا کر صفا و مروہ کی دونوں پہاڑیوں پر رکھ دیا اور ان دونوں بتوں کی پوجا
کرنے لگے۔
پھر جب
عرب میں اسلام پھیل گیا تو مسلمان "اساف
ونائلہ” دونوں بتوں کی وجہ سے ان
دونوں پہاڑیوں پر جانے کو گناہ سمجھنے لگے اس وقت اللہ تعالیٰ نے قرآن مجید میں یہ
حکم نازل فرمایا کہ صفا و مروہ کے طواف اور ان دونوں کی زیارت میں کوئی حرج و گناہ
نہیں بلکہ حج و عمرہ دونوں عبادتوں میں
صفا و مروہ کا طواف ضروری ہے۔تفسیر صاوی، ج ۱، ص ۱۳۲ ، پ ٢ ، البقرة : ١٥٨)
فتح مکہ کے دن حضور سید اکرم صلی اللہ علیہ وسلم نے ان
دونوں پہاڑیوں پر سے "اساف ونائلہ” دونوں بتوں کو توڑ پھوڑ کر نیست و
نابود کر دیا اور ان دونوں پہاڑیوں کو حسب دستور سابق مقدس و معظم قرار دے کر ان
دونوں کا طواف حج وعمرہ میں ضروری قرار دیا گیا۔
چنانچہ
قرآن مجید میں ارشاد ہوا کہ:
اِنَّ الصَّفَا وَ الْمَرْوَةَ مِنْ
شَعَآىٕرِ اللّٰهِۚ–فَمَنْ حَجَّ الْبَیْتَ اَوِ اعْتَمَرَ فَلَا جُنَاحَ عَلَیْهِ اَنْ یَّطَّوَّفَ بِهِمَاؕ–وَ مَنْ تَطَوَّعَ خَیْرًاۙ–فَاِنَّ اللّٰهَ شَاكِرٌ عَلِیْمٌ(ب ٢ البقرة
: ١٥٨)
ترجمہ کنز الایمان: بیشک
صفا اور مروہ اللہ کے نشانوں سے ہیں تو جو اس گھر کا حج یا عمرہ کرے اس پر کچھ
گناہ نہیں کہ ان دونوں کے پھیرے کرے اور جو کوئی بھلی بات اپنی طرف سے کرے تو اللہ
نیکی کا صلہ دینے والا خبر دار ہے۔
درس ہدایت : صفا اور مروہ دونوں پہاڑیوں پر حضرت ہاجرہ
رضی اللہ تعالیٰ عنہا نے دوڑ کر پانی تلاش کیا تو ایک نبی یعنی حضرت ابراہیم علیہ
السلام کی بیوی اور ایک نبی یعنی حضرت اسمعیل علیہ السلام کی ماں حضرت بی بی ہاجرہ
رضی اللہ تعالیٰ عنہا کے قدم ان پہاڑیوں پر پڑ جانے سے ان دونوں پہاڑیوں کو یہ عزت
و عظمت مل گئی کہ حضرت بی بی ہاجرہ رضی اللہ تعالیٰ عنہا کی ایک مقدس یادگار بن
جانے کا ان دونوں پہاڑیوں کو اعزاز و شرف مل گیا اور یہ دونوں پہاڑیاں حج و عمرہ
کرنے والوں کے لئے طواف وسعی کا ایک مقبول و محترم مقام بن گئیں ۔ اس سے یہ ہدایت
کا سبق ملتا ہے کہ اللہ والوں اور اللہ والیوں سے اگر کسی جگہ کو کوئی خاص تعلق
حاصل ہو جائے تو وہ جگہ بہت معزز و معظم بن جاتی ہے اور ہر مسلمان کے لئے وہ جگہ
قابل تعظیم ولائق احترام ہو جاتی ہے ورنہ مکہ معظمہ میں بہت کی پہاڑیاں اور چھوٹے
بڑے بہت سے پہاڑ ہیں ، مگر صفاو مروہ کی چھوٹی چھوٹی پہاڑیوں کو جو تقدس و عظمت
حاصل ہے وہ کسی دوسرے پہاڑ کو حاصل نہیں۔ اس کی وجہ اس کے سوا اور کیا ہو سکتی ہے
کہ یہ دونوں پہاڑیاں ایک اللہ والی کی ایک مبارک جدو جہد کی یادگار ہیں ۔
اس پر
گنبد خضرا اور اولیاء اللہ کے روضوں اور ان حضرات کی عبادت گاہوں اور دوسرے مقدس
مقامات کو قیاس کر لینا چاہئے کہ یہ سب خاصان خدا کی نسبت و تعلق کی وجہ سے معزز و
معظم اور قابل تقدس ولائق تعظیم و احترام ہیں اور ان سب جگہوں کی تعظیم و توقیر
خداوند قدوس کی خوشنودی کا باعث اور ان سب مقامات کی بے ادبی و تحقیر قہر قہار و
غضب جبار کا سبب ہے۔ لہذا ان لوگوں کو جو گنبد خضراء اور مقابر اولیاء اللہ کی بے
ادبی کرتے اور ان کو منہدم اور مسمار کرنے کا پلان بناتے رہتے ہیں ، انہیں ان
حقائق کے ستاروں سے ہدایت کی روشنی حاصل کرنی چاہئے اور اپنی نحوستوں اور بد بختیوں
سے تائب ہو کر صراط مستقیم کی راہ پر ثابت قدم ہو جانا چاہیے۔ خداوند قدوس اپنے حبیب
کریم علیہ الصلوۃ والتسلیم کے طفیل میں سب کو ہدایت کا نور عطا فرمائے اور صراط
مستقیم کی شاہراہ پر چلائے ۔ (آمین)